សម រង្ស៊ី-កឹម សុខា និង រ៉ុង ឈុន ត្រៀមខ្លួន រួចជាស្រេច នៅចំពោះមុខ តុលាការ

ភ្នំពេញ ៖ មេដឹកនាំគណបក្សសង្គ្រោះជាតិ លោក សម រង្ស៊ី និងអនុប្រធាន កឹម សុខា ព្រមទាំងលោក រ៉ុង ឈុន ប្រធានសហភាពសហជីពកម្មករ បានត្រៀមខ្លួនរួច ជាស្រេច ចំពោះការចូលទៅបំភ្លឺនៅចំពោះ មុខតំណាងអយ្យការ អមសាលាដំបូងរាជធានីភ្នំពេញ នាព្រឹកថ្ងៃទី១៤ ខែមករា ឆ្នាំ ២០១៤ ដែលមានមេធាវីការពារក្ដីទៅជាមួយ ។

មេធាវីការពារក្ដីម្នាក់ក្នុងចំណោម ៣ នាក់ របស់លោក សម រង្ស៊ី និងលោក កឹម សុខា គឺលោក កើត ធី នៅ រសៀល ថ្ងៃទី១៣ ខែមករា ឆ្នាំ ២០១៤ បានថ្លែងប្រាប់មជ្ឈមណ្ឌលព័ត៌មានដើមអម្ពិលតាមទូរស័ព្ទថា នៅព្រឹកស្អែក (១៤ មករា ២០១៤) កូនក្ដី របស់លោកនឹងចូលទៅបំភ្លឺនៅសាលាដំបូងរាជធានីភ្នំពេញ តាមម៉ោងកំណត់ ។

លោកមេធាវី កើត ធី បានថ្លែងឱ្យដឹងទៀតថាលោក និងកូនក្ដីមានឯកសារគ្រប់គ្រាន់ និងត្រៀមខ្លួនរួចជាស្រេចចំពោះ ការចោទសួរទាំងឡាយណាពីសំណាក់តំណាងអយ្យការ ។ បើតាមលោកមេធាវី កើត ធី គឺ មានមេធាវី ៣នាក់ រួម ទាំងលោកដែលត្រូវឡើងការពារក្ដីជូនលោក សម រង្ស៊ី និង លោក កឹម សុខា ដែល មេធាវី ២នាក់ទៀត ម៉េង សុធារី និងមេធាវី ចាន់ ចេន បាន និងកំពុងមកដាក់ពាក្យធ្វើមេធាវីជាផ្លូវការនា រសៀលថ្ងៃទី១៣ ខែមករា ឆ្នាំ២០១៤ ។
ដោយឡែកលោក រ៉ុង ឈុន ក៏បានបញ្ជាក់ថា លោកអមដោយ មេធាវី ៥នាក់ បានត្រៀមខ្លួនរួចជាស្រេចចំពោះការ ចូលទៅបំភ្លឺ តាមដីកាកោះអញ្ជើញរបស់ព្រះរាជអាជ្ញារង អមសាលាដំបូងរាជធានីភ្នំពេញ លោក ហៀង សុភក្ដ្រ ដែលបានចោទប្រកាន់ពីបទញុះញង់ឱ្យប្រព្រឹត្ដបទឧក្រិដ្ឋ ឬប្រព្រឹត្ដអំពើបង្កឱ្យមានភាពវឹកវរធ្ងន់ធ្ងរដល់សន្ដិសុខ សង្គម ។

ថ្លែងប្រាប់មជ្ឈមណ្ឌលព័ត៌មានដើមអម្ពិលតាមទូរស័ព្ទ នៅរសៀលថ្ងៃទី១៣ ខែមករា ឆ្នាំ២០១៤ លោក រ៉ុង ឈុន បាន បញ្ជាក់ថា លោកនឹងចូលទៅបំភ្លឺតាមដីកាកោះហៅ របស់តុលាការ ។

សូមបញ្ជាក់ថា កាលពីថ្ងៃទី០៣ ខែមករា ឆ្នាំ២០១៤ កន្លងទៅ ព្រះរាជអាជ្ញារងអម សាលាដំបូង រាជធានី ភ្នំពេញ លោក ហៀង សុភក្ដ្រ បានចេញដីកាកោះអញ្ជើញលោក សម រង្ស៊ី ទៅបំភ្លឹនៅតុលាការវេលាម៉ោង ៩ ព្រឹក ថ្ងៃទី១៤ ខែមករា កោះអញ្ជើញ លោក កឹម សុខា ទៅបំភ្លឺនៅវេលាម៉ោង ៩ ព្រឹក ថ្ងៃទី១៤ ខែមករា និងលោក រ៉ុង ឈុន ទៅបំភ្លឺ នៅវេលាម៉ោង ៨ព្រឹក នាថ្ងៃទី១៤ ខែមករា ឆ្នាំ២០១៤ ។ ការចេញដីកាកោះអញ្ជើញមេដឹកនាំគណបក្សប្រឆាំង និងមេ សហជីពមួយរូបខាងលើនេះ បានកើតឡើងក្រោយពីមានការប៉ះទង្គិចគ្នា រហូតមានស្លាប់ និងរបួសនៅតំបន់២សំខាន់ ៗ គឺក្បែរ តំបន់សេដ្ឋកិច្ចពិសេសភ្នំពេញ ខណ្ឌពោធិ៍សែនជ័យ និងការប៉ះទង្គិចគ្នានៅតាមផ្លូវវ៉េង ស្រេង សង្កាត់ ចោមចៅ ខណ្ឌពោធិ៍សែនជ័យ ។

កាលពីប៉ុន្មានថ្ងៃមុននេះ មេធាវីរបស់ ប្រធានគណបក្សប្រឆាំងទាំង២នាក់ លោក ជួង ជូងី បានប្រកាសពន្យារពេល ចូលទៅបំភ្លឺ ប៉ុន្ដែ ក្រោយមកគណបក្សសង្គ្រោះជាតិ បានចេញសេចក្ដីថ្លែងការណ៍ចូលទៅបំភ្លឺ នៅចំពោះមុខតុលាការ របស់មេដឹកនាំទាំង ២នាក់ អមដោយការបញ្ជាក់ទៅកាន់សកម្ម ជនរបស់ខ្លួន នៅ តាមបណ្ដាខេត្ដផងដែរ ៕

(ប្រភព៖ ដើមអម្ពិល)