រ៉ូលីន​ ពិ​ចារណា​​សំណើ​​ទៅ​អូ​ស្ត្រាលី​ ខណៈ​ការងារ​​ក្នុង​ស្រុក​​កំពុង​​ត្រូវ​ប៉ាន់​​

រាជធានីភ្នំពេញ ៖ តារាចម្រៀងភេទទី៣ ដែលកំពុងតែមានឈ្មោះបោះសំទ្បេង រ៉ូលីន កំពុងតែពិចារណាសំណើចេញ ទៅសម្តែងនៅប្រទេសអូស្ត្រាលី នៅក្នុងអំទ្បុងពេលបុណ្យចូលឆ្នាំខ្មែរ ថាតើខ្លួនគួរតែទៅ ឬមិនទៅ ខណៈការងារសិល្បៈនៅក្នុងស្រុកកំពុងត្រូវប៉ាន់ ។ សំណើឱ្យចេញទៅសម្តែងនៅ ប្រទេសអូស្ត្រាលីរបស់រ៉ូលីន គឺក្រោយពេលទើបតែបញ្ចប់ ការសម្តែងនៅសហរដ្ឋអាមេរិក ។ តារាចម្រៀងបានទាំងសំទ្បេងប្រុស និងសំទ្បេងស្រីរូបនេះ អះអាងថា ការសម្តែងរបស់ខ្លួនលើកទី១ នៅទឹកដីអាមេរិក ទទួលបានជោគជ័យ ។

រ៉ូលីនគ្មានបំណងចេញទៅសម្តែង នៅក្រៅប្រទេសទេ នៅក្នុងអំទ្បុងពេលនេះ ខណៈពេលចំណូលបានច្រើនពីការងារសិល្បៈនៅក្នុងស្រុក ។ មូលហេតុនេះហើយ ដែលចង់មិនចង់ធ្វើឱ្យតារាចម្រៀងរូបនេះ កំពុងតែពិចារណាក្នុងការទទួលយកសំណើចេញទៅសម្តែងនៅក្នុង ប្រទេស
អូស្ត្រាលី ដែលនឹងធ្លាក់មកនៅក្នុងអំទ្បុង ពេលបុណ្យចូលឆ្នាំខ្មែរខាងមុខ។

រ៉ូ លីន អះអាងប្រាប់កោះសន្តិភាពក្នុងជំនួប ផ្ទាល់មួយពេលចូលរួមពិធី សម្ពោធហាងតែគជ់មួយក្នុងរាជធានីភ្នំពេញ កាលពីពេល ថ្មីៗនេះថា គេកំពុងតែគិតពិចារណាថា តើគួរទទួលយកសំណើចេញទៅសម្តែង នៅប្រទេសអូស្ត្រាលី ឬក៏យ៉ាងណានៅក្នុងអំទ្បុងពេលនេះ ព្រោះការងារនៅក្នុងស្រុក កំពុងតែមានភាពមមាញឹកខ្លាំង ។ ស្ថិតនៅក្នុងអំទ្បុងពេលនេះ គេនៅមិនទាន់គិតដល់ការចេញទៅសម្តែងនៅឯក្រៅប្រទេសទ្បើយ ព្រោះការងារនៅក្នុងស្រុកអាចរកប្រាក់បានច្រើនគួរសម ។ ការងារនៅក្នុងស្រុក គឺមមាញឹកស្ទើររាល់ថ្ងៃ ខណៈពេលដែលរូបលោកមិនអាចដកឃ្លាទៅណាបានពីកម្មវិធី Mr and Miss Talk Show និងកម្មវិធី«ពេញចិត្តឬអត់?»របស់ស្ថានីយទូរទស្សន៍ My TV ។

ទាក់ទងទៅនឹងចំណូលដែលទទួលបានពីការងារនៅក្នុងស្រុក មិនត្រូវរ៉ូលីនបញ្ជាក់ឱ្យដឹងទ្បើយ ប៉ុន្តែអះអាងដោយខ្លីថា ចំណូលដែលគេទទួលបាននោះ គឺសមល្មមសម្រាប់ដោះស្រាយជីវភាពប្រចាំថ្ងៃ ហើយតម្លៃខ្លួននៃការសម្តែង ក៏សមល្មមអាចទទួលយកបាន មិនថ្លៃដូចតារា ល្បីៗមួយចំនួនទ្បើយ ៕