ទស្សនិកជន មិត្តសិល្បករ សិល្បការិនី សម្ដែងការភ្ញាក់ផ្អើលនៅពេលដឹងថាកញ្ញា ព្រីម លីហ្សា ឈ្នះពានផ្នែកប្រជាប្រិយភាពពីកម្មវិធីអាណាចក្រតារាឆ្នាំ២០១៣។ តើមូលហេតុអ្វីបានជាតារាសម្ដែង sexy រូបនេះទទួលបានពានអាណាចក្រតារា?
ព្រឹកនេះកញ្ញា ព្រីម លីហ្សា បានចូលខ្លួនមកបកស្រាយរាល់ចម្ងល់ ក៏ដូចជាការរិះគន់ទាំងឡាយជុំវិញ កញ្ញាទទួលពានផ្នែកប្រជាប្រិយភាពពីកម្មវិធីអាណាចក្រតារាឆ្នាំ២០១៣នេះ។ ខាងក្រោមគឺជាបទសម្ភាសន៍ផ្ទាល់រវាង sabay និងកញ្ញា ព្រីម លីហ្សា។
ព្រីម លីហ្សា ក្នុងថ្ងៃទទួលពានអាណាចក្រតារា
Sabay៖ បន្ទាប់ពីកញ្ញា ព្រីម លីហ្សា ទទួលពានអាណាចក្រតារាឆ្នាំ២០១៣ផ្នែកតារាសម្ដែងប្រជាប្រិយភាពកន្លង ទៅថ្មីៗនេះមានពាក្យចចាមអារ៉ាមមួយចំនួននិយាយថា លីហ្សា មិនសក្ដិសមនឹងទទួលពាននេះទេ តើ លីហ្សា មានអ្វីចង់បកស្រាយ?
លីហ្សា៖ ខ្ញុំទទួលស្គាល់ថាទេពកោសល្យ នៃការសម្ដែងរបស់ខ្ញុំនៅមានកម្រិត ក៏ប៉ុន្តែពានដែលខ្ញុំទទួលបាននេះមិនមែនជាពានទេពកោសល្យទេ គឺពានផ្នែកប្រជាប្រិយភាពដែលទទួលបានការគាំទ្រពីទស្សនិកជនតាមរយៈ ការបោះឆ្នោត។ បណ្ដាញសារព័ត៌មាន ក៏ដូចជាពិធីករបានប្រកាសរួចថាពាននេះកើតចេញពីការបោះឆ្នោតពី មហាជន អ្នកគាំទ្ររបស់ខ្ញុំគេបោះឆ្នោតឱ្យខ្ញុំជាប់ ឱ្យខ្ញុំបដិសេធន៍មិនយកឬយ៉ាងណា។
Sabay៖ តើកញ្ញា ព្រីម លីហ្សា មានវិធីសាស្ត្របែបណាដើម្បីឱ្យ Fans បោះឆ្នោតគាំទ្រច្រើនលើសលប់បែបនេះ?
លីហ្សា៖ ខ្ញុំបានដឹងព័ត៌មាននៅតាម website កាសែត និងទស្សនាវដ្ដីនានាទាក់ទងទៅនឹងកម្មវិធីអាណាចក្រតារា។ ដូច្នេះហើយនៅមុនមួយខែពេលកម្មវិធីនេះចាប់ផ្ដើមខ្ញុំបានសរសេរ សារនៅលើ wall Facebook របស់ខ្ញុំដោយស្នើទៅដល់អ្នកគាំទ្រខ្ញុំសុំឱ្យពួកគាត់ជួយគាំទ្រ ខ្ញុំនៅក្នុងកម្មវិធីនេះ។ ពេលកម្មវិធីអាណាចក្រតារាដាក់ឱ្យមហាជនបោះឆ្នោតគាំទ្ររយៈពេលបី ខែគឺខ្ញុំបានលះបង់ខ្ពស់ណាស់។ ជារៀងរាល់ថ្ងៃខ្ញុំតែងសរសេរសារនៅលើ wall របស់ខ្ញុំដដែលៗសុំឱ្យគេជួយបោះឆ្នោតគាំទ្រ។
ម្យ៉ាងទៀតនៅពេលខ្ញុំនាំយកអំណោយជួយដល់សិស្សសាលាក្រីក្រមួយ ចំនួនខ្ញុំតែងទៅសំពះសុំពួកគាត់ឱ្យចូលទៅក្នុង website អាណាចក្រតារាមើលលេខកូដរបស់ខ្ញុំដើម្បីបោះឆ្នោតគាំទ្រ។ ខ្ញុំខំប្រឹងណាស់ដើម្បីគេបោះឆ្នោតគាំទ្រខ្ញុំ មិនមែនសុខៗមនុស្សម្នាក់មកបោះឆ្នោតគាំទ្រខ្ញុំឯណា លុះត្រាតែយើងមានអ្វីមួយនិយាយទៅកាន់គេដែរបានគេជួយផ្ញើសារមួយ ឬច្រើនទៅកាន់យើង។
ខ្ញុំលើកហេតុផលមួយប្រៀបដូចជាការបោះឆ្នោតថ្នាក់ជាតិទើបចប់ កាលពីពេលថ្មីៗចឹង សួរថាអ្នកតំណាងរាស្ត្រមួយរូបចង់ជាប់ឆ្នោតដោយគាត់អង្គុយនៅតែ មួយកន្លែងដោយចាំឱ្យប្រជាជនមកបោះឆ្នោតឱ្យ សួរថាតើប្រជាជនគាត់បោះឆ្នោតឱ្យទេ បើគាត់មិនដែលស្គាល់មុខ មិនដែលនិយាយអ្វីទៅកាន់គាត់បន្តិចផងនោះ។
Sabay៖ មានដំណឹងលេចលឺថា កញ្ញា ព្រីម លីហ្សា បានទិញស៊ីមទូរស័ព្ទជាច្រើនដើម្បីឱ្យអ្នកគាំទ្ររបស់ខ្លួនជួយបោះឆ្នោតគាំទ្រ តើនេះជាការពិតឬយ៉ាងណា?
លីហ្សា៖ ខ្ញុំសុំបដិសេធន៍ទាំងស្រុងចំពោះព័ត៌មាននេះ ខ្ញុំគ្រាន់តែប្រាប់ទៅបងប្អូនរបស់ខ្ញុំ និងអ្នកគាំទ្រ របស់ខ្ញុំជារៀងរាល់ថ្ងៃឱ្យពួកគេជួយបោះឆ្នោតឱ្យខ្ញុំតែ ប៉ុណ្ណោះមិនបានទៅទិញស៊ីមឱ្យអ្នកណាបោះឆ្នោតគាំទ្រនោះទេ។ បើទោះជាខ្ញុំទិញស៊ីមឱ្យគេបោះឆ្នោតឱ្យក៏ដោយ បើគេមិនពេញចិត្តយើងផងសួរថាតើអ្នកណាបោះឆ្នោតឱ្យយើង។ គេអាចទិញអ្វីៗបានប៉ុន្តែមិនអាចទិញទឹកចិត្តមនុស្សបានទេ។
Sabay៖ លីហ្សា ថ្មីៗនេះដែរមានសិល្បការិនីមួយចំនួនបានច្រណែន និងរិះគន់មិនតិចទេចំពោះអ្វីដែលកញ្ញាទទួលបានពាននេះ ខណៈកេរ្តិ៍ឈ្មោះរបស់កញ្ញាហាក់មិនមានគេស្គាល់ច្រើនទេនៅក្នុង ពិភពសិល្បៈ តើលីហ្សា មានសារអ្វីផ្ញើរទៅកាន់ពួកគាត់វិញទេ?
លីហ្សា៖ ដូចខ្ញុំបានបញ្ជាក់នៅខាងដើមចឹង ថាខ្ញុំទទួលការរិះគន់ទាំងឡាយពីមិត្តសិល្បករទាំង ឡាយ ក៏ប៉ុន្តែគួរណាតែសួរខ្លួនឯងសិនមុននឹងធ្វើការរិះគន់ទៅកាន់ នរណាម្នាក់ថាតើយើងបានធ្វើអ្វីខ្លះចំពោះអ្នកគាំទ្ររបស់ខ្លួន អំឡុងកម្មវិធីអាណាចក្រតារាដាក់ឱ្យបោះឆ្នោតរយៈពេលបីខែ។
មានបានប្រាប់ Fans ក្នុង Facebook ឬបងប្អូនសាច់ញាតិឱ្យគេបោះឆ្នោតគាំទ្រឱ្យឬទេ ឬមួយគិតថា ខ្លួនឯងល្បីហើយចាំតែលើកពាន។ ខ្ញុំសូមបញ្ជាក់ថា នេះជាពានផ្នែកប្រជាប្រិយភាពកើតចេញពីការបោះឆ្នោតគាំទ្ររបស់ មហាជន បើយើងមិនទៅរកគេ តើយើងធ្វើយ៉ាងម៉េចឱ្យគេបោះឆ្នោតឱ្យយើងកើត ហើយចេះតែគិតថាអយុត្តិធម៌ៗ។ គេមានក្រុមហ៊ុនស្តង់ដារត្រួតពិនិត្យមកពីប្រទេសអង់គ្លេសច្បាស់ លាស់ ហើយប្រសិនណាបើអ្នកឯងមានគេបោះឆ្នោតគាំទ្រច្រើនមែននោះប្រាកដ ជាជាប់មិនខាន។
Sabay៖ តើកញ្ញា ព្រីម លីហ្សា មានយុទ្ធសាស្ត្រដូចម្ដេចទៀតដើម្បីរក្សាពាននេះនៅឆ្នាំក្រោយ ហើយរំពឹងថានឹងទទួលបានពាននេះតទៅទៀតទេប្រសិនណាបើអាណាចក្រតារា ឆ្នាំ២០១៤បន្ត?
លីហ្សា៖ ការឈ្នះចាញ់មិនសំខាន់ទេ ហើយខ្ញុំក៏មិនទាន់រំពឹងថា នឹងអាចទទួលបានពាននេះ ជាថ្មីឬយ៉ាងនោះទេនៅឆ្នាំក្រោយ ក៏ប៉ុន្តែខ្ញុំនឹងព្យាយាមបន្ថែមទៀតជាមួយអ្នកគាំទ្ររបស់ខ្ញុំ នៅតាម Facebook ក៏ដូចជានៅខាងក្រៅ។
Sabay៖ បន្ទាប់ពីទទួលពាននេះហើយកញ្ញា ព្រីម លីហ្សា រំពឹងថានឹងទទួលទីផ្សារខ្ពស់ឬយ៉ាងណា?
លីហ្សា៖ ខ្ញុំគិតថានឹងកើនឡើងព្រោះគ្រាន់តែ ទទួលបានពានរហូតមកទល់នឹងពេលនេះមានក្រុមហ៊ុនជាច្រើនបានទាក់ទង មកខ្ញុំជាបន្តបន្ទាប់។
Sabay៖ ជាចុងក្រោយកញ្ញា ព្រីម លីហ្សា មានអ្វីចង់បន្ថែមទាក់ទងទៅនឹងការទទួលបានពានរបស់ខ្លួនក៏ដូចជាកម្មវិធីអាណាចក្រតារាឆ្នាំ២០១៣នេះ?
លីហ្សា៖ ខ្ញុំគ្មានពាក្យពេចន៍អ្វីក្រៅតែពីអរគុណដល់ទស្សនិកជន ជាពិសេស Fans ក្នុង Facebook របស់ខ្ញុំដែលបានជួយបោះឆ្នោតគាំទ្រខ្ញុំរហូតដល់ខ្ញុំទទួលបាន អាណាចក្រតារានេះ ហើយក៏សូមអរគុណដល់កម្មវិធីអាណាចក្រតារាដែរ ដែលបានដាក់បញ្ចូលឈ្មោះរបស់ខ្ញុំជាបេក្ខភាពប្រកួតប្រជែងក្នុង កម្មវិធីនេះ។ ម្យ៉ាងទៀតខ្ញុំក៏សូមអរគុណដល់អ្នករិះគន់ខ្ញុំទាំងឡាយផងដែរដែល បានធ្វើការរិះគន់កន្លងមក។ ខ្ញុំគ្រាន់តែមានពាក្យខ្លីមួយម៉ាត់ទៅកាន់មិត្តសិល្បករថាប្រសិន ណាបើចង់ឈ្នះពានប្រជាប្រិយភាពនេះត្រូវតែពង្រឹងអ្នកគាំទ្ររបស់ ខ្លួន ហើយស្នើសុំឱ្យពួកគេជួយបោះឆ្នោតឱ្យប្រសិនបើអាណាចក្រតារារៀបចំនៅ ឆ្នាំ២០១៤ខាងមុខ។
នេះជាលើកទីមួយហើយដែលតារាសម្ដែង sexy ព្រីម លីហ្សា ទទួល ពានជាតារាសម្ដែងមានប្រជាប្រិយភាពពីកម្មវិធីអាណាចក្រតារា។ ក្រៅពីទទួលពានក្នុងស្រុកជាលើកដំបូងនេះកញ្ញាក៏ធ្លាប់ទទួលបាន ពានពីក្រៅប្រទេសផងដែរពីប្រទេសវៀតណាម៕
ប្រភពពី : sabay 